Бейжің Қытай Халық Республикасында инвесторларға интернет арқылы компанияны толық тіркеу қызметін ұсынған алғашқы қала болды. Бұл туралы China Daily хабарлады.
Бейжің қалалық муниципалдық даму және реформалар комиссиясының директоры Ян Сюлиннің айтуынша, компания құру процесі соңғы уақытта екі-үш айдан бір күнге дейін қысқартылды. Бұл Қытайдағы бизнес тіркеудің ең жылдам түрі. China Daily хабарлауынша, қала билігі осылайша Қытай астанасының инвестициялық тартымдылығын арттыруды мақсат етіп отыр.
«Соңғы жылдары Бейжің шетелдіктерге елордада оңай және жеңіл тұрақтап, шетелдік компанияларға қалада ғылыми-зерттеу және тәжірибелік-конструкторлық орталықтарды ашуға арналған бірқатар шараларды қабылдады... Қызмет үнемі жетілдіріліп, толықтырылып отыр», — деді Ян Сюлин.
Муниципалды даму және реформалар комиссиясының мәліметі бойынша, 2023 жылдың соңында Бейжіңде 245 трансұлттық компаниялардың аймақтық штаб-пәтерлері мен 149 шетелдік ғылыми-зерттеу орталықтары орналасқан.
Бейжің билігі 122 шетелдік кәсіби біліктілікті мойындап, шетелдік мамандар үшін жұмыс істеу және тұрғылықты жерге рұқсат алу процесін біріктірді. Бұл құжаттарды рәсімдеу мерзімі 17 күннен бес күнге дейін қысқарды. Сонымен қатар, сыртқы сауда саласындағы рұқсат беру рәсімдерін жеңілдету жұмыстары жүріп жатыр.
Соңғы жеті жылда Бейжің билігі бизнесте шамамен бір жарым мың реформа өткізді. Қалада орташа есеппен күніне 337 ғылыми-техникалық компания ашылады.
